Оңтүстік Қазақстан облысының дәрігерлері қағаз рецептердің орнына электронды рецептер қолдана бастаған.
Жергілікті “Отырар” телеарнасының хабарлауынша, енді пациенттер қағаз рецептіде жазылған сөздерді ажыратуға уақыт жұмсамай, бірден дәріханаға барып электронды рецепт арқылы дәрі-дәрмек ала алады.
Оның жұмыс істеу механизмі мынадай: берілген рецептердің бәрі деректер қорына енгізіліп отырады. Бұл аурухана, дәріхана мен науқастардың арасында ашық қарым-қатынастың орнауына ықпал етеді. Электронды рецептпен дәрі-дәрмек алу үшін азаматтарда тек төлқұжат болса ғана жеткілікті.
“Бұл бағдарлама аурухана, дәріхана, денсаулық сақтау мекемелері мен министрлікте – бәрінде қатар орнатылған. Науқас дәріханаға жеткенше фармацевт оның қандай дәрі сұрап келетінін алдын-ала біліп отырады. Ол алынған дәрілердің бәрін онлайн базаға тіркейді. Бір рецепт екі мәрте қолданылмас үшін әрбір рецептке арнайы код бекітілген” – дейді ҚР денсаулық сақтау министрлігінің дәрі-дәрмекті қадағалау басқармасының бастығы Сәуле Исмаилова.
Алайда бұл қағаз рецептілер мүлдем қолданылмайды дегенді білдірмейді. Бұл жүйе Қазақстанның барлық аймақтарында тұтастай енгізілмегендіктен электронды рецептермен қатар қағаз рецептер де қолданыла береді.
Ақпарат көзі: profit.kz
Сурет: raik.by
